समाज » होस्टेलदेखि सयमिटरको दुरीमा रितुको हत्या

काठमाडौं : राजधानीको केन्द्रमा होस्टेलबाट विवाह भोजका लागि निस्केकी एक युवतीको छुरा प्रहार गरी हत्या भएको २४ घन्टा बित्दा पनि प्रहरीले यसमा संलग्न अभियुक्तलाई पक्राउ गर्न सकेको छैन।

शनिबार मध्यान्ह मैतीदेवीस्थित एसएनएस गल्र्स होस्टेलबाट घट्टेकुलोस्थित आफन्तको बिहे भोजमा जान निस्केकी २० वर्षीया रितु महासेठको होस्टेलदेखि करिब सयमिटरको दुरीमा छुरा प्रहार गरी हत्या भएको थियो। रितु कान्तिपुर कलेजमा बिबिए प्रथम वर्षमा अध्ययनरत विद्यार्थी हुन्। रितुको हत्या भएको घटना केही रहस्यमयजस्तो देखिएको महानगरीय प्रहरी परिसर काठमाडौंका प्रवक्ता नावय उपरीक्षक दिनेश आचार्यले बताए। आचार्यअनुसार प्रहरीले घटनाको विस्तृत अनुसन्धान गरिरहेको छ। उनले प्रहरीले हत्यामा संलग्न व्यक्तिहरुको खोजी गरिरहेको र छिटै पक्राउ पर्ने बताए।

होस्टेलबाट रितुसँगै हिडेका अन्य तीनजनामाथि भने कुनै आक्रमण भएको छैन। होस्टेलबाट निस्केपछि सय मिटरको दुरीमा अपरिचित व्यक्तिले उनलाई छुरा प्रहार गरी फरार भएको थियो। छुरा प्रहारबाट गम्भीर घाइते भएकी रितुलाई सुरुमा काठमाडौं मेडिकल कलेजमा लगिएको थियो। स्थिति गम्भीर भएपछि उनलाई पछि शिक्षण अस्पतालमा भर्ना गरिएको थियो। शिक्षण अस्पतालमै उनलाई मृत घोषणा गरिएको थियो। annapurnapost.com